દૃશ્યો જુએ છે એ ખરાબ- આંખને સજા કરો,
પાછી ગણાવે એને ખ્વાબ- આંખને સજા કરો!
મહુડો મેં રેડ્યો તાંસળીમાં પહેલી ધારનો છતાં,
પીવે છે એ ગણીને રાબ- આંખને સજા કરો!
સુરમો લગાવતો રહું છું રોજ મારી જાતે તોય,
કીકીમાં એણે પાડ્યો ડાઘ- આંખને સજા કરો!
સસલામાં જોવે વાઘ, કાકિડો ગણે એ વાઘને,
શ્રાવણમાં ડોબી ખેલે ફાગ- આંખને સજા કરો!
પાંપણનો રવ ન પારખે એ એટલી બહેરી થઈ,
ગાયા કરે છે એક રાગ- આંખને સજા કરો!
- મેહુલ મંગુબહેન, 22 ફેબ્રુઆરી 2021, નવી દિલ્હી
છંદોલયઃ ગાગા લગા લગાલ ગાલ ગાલગા લગા લગા
ખાસ નોંધ : આ ગઝલને છંદબદ્ધ કરવાનો સઘળો શ્રેય કવિ શ્રી પંચમ શુકલને જાય છે. મને ન તો છંદ આવડે છે અને ન તો એમાં લખવામાં રસ પડે છે.
